Fingià daspö decennis spetta la populaziun da Sta. Maria in Val Müstair sün üna soluziun da trafic perdürabla. La situaziun actuala tras las strettüras da la via tras cumün es privlusa.
Illas fracziuns dal cumün da Val Müstair cun Tschierv, Fuldera e Valchava es la situaziun dal trafic sün via scholt pel bön da la populaziun. Per Müstair s’haja chattà üna soluziun chi satisfa, però a Sta. Maria s’esa daspö ons ed onnorums in tschercha d’üna soluziun perdürabla. La via tras Sta. Maria es per part uschè stretta, cha duos autos nu pon cruschar e pels peduns ün schaschin cumbinà cun grond privel. Implü as bada cha eir la substanza da la via e da las chasas patischa. I’s tratta d’üna fracziun cun ün purtret da cumün d’importanza naziunala ISOS. Da l’on 1997 vaiva la radunanza cumünala da Sta. Maria decis da vulair sviar il cumün vers süd. In lügl dal 2013 vaiva l’Uffizi chantunal da construcziun bassa (UCB) preschantà al suveran da Val Müstair il proget per ün sviamaint. Cunter quel haja dat gronda opposiziun, però il suveran ha decis cun 195 cunter 41 vuschs da s’ingaschar inavant per ün sviamaint al süd da quel.